Semoga Kaga di Gudang

Kepala Emak masih kliyengan pas turun dari ojek daring. Die kaga nyangka kerja jadi guru PNS di daerah kaga bisa leha-leha nikmatin idup. Abis murid-murid pulang sekolah jam 3 sore, bukan berarti bisa lenggang kangkung trus nimbrung gosip ama tetangga. Masih ade tugas nyusun rencana pembelajaran tiap tahun, evaluasi pembelajaran tiap semester, inovasi cara pembelajaran, belom kalo kudu koordinasi di dinas pendidikan kota ato propinsi. Maklum, sekolah tempatnye ngajar jadi percontohan di tingkat kota. Pulang sampe rumah jam 7 malam dan belom sholat maghrib udah kayak kebiasaan sebulan ini aje. 

Masih untung ojeg ni hari asli orang Yogya. Lahh, apa urusannye? Iye, jago ngebut dan selap-selip mobil ama bis di jalanan Serpong-Pondok Aren yang rame padet. Tuntutan perut bikin Emak mikir mendingan makan dulu, sepotong ato dua buah iris yang tadi dibelinya. Buat ganjal aje, supaya perutnye kaga ‘nyanyi-nyanyi’ pas lagi sholat.

Waktu ‘rebutan’ potongan buah ama si Adek baru aje dimulai, tetiba si Adek teriak, “Wa’alaikumussalaam...”, ehhh Emak kok ga dengar ada orang kasih salam ya? Padahal, jarak pintu ama tempat mereka duduk makan buah cuman sepelemparan sapu ijuk. 

“Emang ada yang kasih salam, dek?” 

“Ada,” jawab si adek yakin. Bikin Emak penasaran ngintip lewat gorden. Ahhh ... ya ammpunn, itu kan si Mardani, sepupunye yang anak Ncing Roiyah. Die kan jarang ... ehhh ... hampir kaga pernah komunikasi, bahkan kalo Emak maen ke rumah Ncing Roiyah. 

“Siapa Mak?” Tanya adek saat Emak berusaha cari konci pintu. “Om Mardani. Kamu tahu kan?” Adek emang susah kalau diajak ke rumah sodara. 

“Engga. Emang siapa, Mak?” Hmm  ... sudah  terduga die ga kenal. “Om nya Babang,” Emak berusaha mengenalkan lewat sepupu sebaya yang Adek kenal. “Ooo ...”.

Hahh ... si Mardani dateng ama bini dan anaknye yang masih bayi?? Bener-bener tumbenan nih. Untung kaga ade petir ama hujan badai yang nyambut. Meski curiga ade ape-ape, Emak tetap berusaha sopan kagak langsung ‘nembak’ keperluan mereka.

“Ayo, masuk Dan. Adeeek, tolong ambilin aer minum 2 gelas yaaa,” Emak nemenin ngobrol yang rasanye basa basi banget. Ape kabar, kok kayaknye sering pulang kampung, anaknye berape bulan, masih ASI ga, bla ... bla ... sambil ngelirik jam. Yaa ampuun dah 19.15, dan gue belum sholat maghrib, padahal Isya 10 menit lagi. Akhirnye Emak minta izin sholat maghrib, sambil nyampein fakta bahwa die baru aje pulang. Mustinye sih keliatan dari muke Emak yang kusam berlapis debu dan asap knalpot. Pakaian dan jilbab kerjanye pun masih nempel.

Abis sholat, kuatir bikin kemalaman pasangan baru setahun ini, apalagi punya anak kecil, Emak terpaksa ‘nembak’. “Omong-omong ini mau nunggu Bang Abdul? Mau ada komputer dibenerin?” Habisnyee, dari tadi ngobrol ngalor ngidul ga jelas juntrungan.

“Hehehe ... sebenernye, aye ade perlu ama mpok. Aye pan kerja di toko onlen bagian gudang. Nahh ini aye dapet masalah. Biasanye aye minta tolong mpo Leha (iparnya, pen.). Tp mpo Leha juga lagi kaga punya.”

Wahh ... bener nih dugaan gue. Denyutan kepala Emak muncul lagi setelah sempat reda makan buah 2 potong.

“Emang, masalahnye ape?” Ujung dari masalah ini, bisa ditebak: pinjem duit.

“Pas aye lagi jaga di gudang, ade barang yang ilang. Sebelom-sebelomnye juga pernah sii ... tapi harganye masih bisa aye ganti. Nahh yang ni mahal banget.”

“Berape nilainye?” Emak bermaksud nanya nilai barang yang hilang.

“Wahh bisa miliaran, mpo kalo sama yang kemaren-kemaren mah.” Bininye interupsi, bahase betawi pake logat sunda nye lumayan luwes.

Hahhh miliaran? “Eh, bu%et ... gede amat, emang apa yang ilang?”

“Itu mah kalo diitung sama yang dulu-dulu yang udah aye ganti, mpo. Ini mah yang ilang Sam^ung S8.”

“Ooo … harganye berape tuh? Bisa bayar lewat potong gaji kan?” Ini ikhtiar defensif Emak aje, sebenernye.

“Kemaren aye udah nego ama bos. Katanye bisa potong gaji, tapi 2 kali aje. Lahh … aye pan kudu beli susu juga buat si ntong nih. Bini aye pan kaga kerja. Jadi aye berat, mpok.” Tampang Mardani ama keluarganye mulai melas.

Masalahnye, baru aje seminggu yang lalu, waktu gajian aje belom, Ncing Roiyah nyaknye Mardani dah nyamber nelpon Emak duluan. “Ncing perlu buat betulin spiteng (septic tank, pen.). Ncing Jiung lu noh, udah maen bongkar aje lahh duit nutupnye kaga ada. Ncing nyalang dulu kek 2 juta, gitu,” suara di telepon itu begitu tegas mempersuasi. Apalagi, Emak inget banget yang seksi repot waktu die nikah, nyunatin anak barep ama bontotnye, yaaa … Ncing Roiyah ni. “Ntar dah 6 bulan lagi ncing dapet arisan. Pasti ncing ganti. Kalo perlu, ntar ncing kasih catetannya dah,” Suaranye berusaha ngeyakinin. Dan besoknye, cicilan buat bayar semesteran kuliah si Kakak harus direlain dulu pindah ke dompet Ncing Roiyah.

“Begitu ceritanye, Dan. Nahh pan sebulan ade 30 hari. Ni aje masih mulaan bulan, mpok udah bingung ngatur. Buat bayar listrik, SPP, bayar les, bulan depan bayar kuliah. Mpok minta maap nih, kaga bisa nyalangin lu dulu.” Emak berusaha jelas, sejelas-jelasnya.

“Gitu ye, mpok. Tadinye, aye juga kaga mau dateng ke Mpok. Takut ngerepotin. Tapi, mpok Leha yang nyuruh. Katanye, namanye juga usaha.”

Mardani mulai cerite, beban kerjanye nanganin catatan keluar masuk barang di gudang, yang sehari bisa ada 4000 pesanan, gimane risiko barang bisa ilang. Katanye, bisa jadi die udah ati-ati, tapi pegawai lain yang jumlahnye 4 orang mungkin ceroboh ato curang. kalo barang rusak, udah ditanggung asuransi. Tapi kalo ilang, perusahaan musti nyelidikin ati-ati. Kalo program promo barang pesanan makin banyak lagi, banyak juga yang buat pesanan fiktif supaye dapat kredit dari toko onlen nye.

Karena makin banyak toko onlen saingan, dan mungkin pengaruh ke omzet, gaji si Mardani ama temen-temennye malah dipotong. Udah setahun ini die nyambi jadi ojek onlen buat nambah-nambah beli susu. Die ngaku udah pengen keluar dari dulu. Tapi takut diomelin ama nyaknye kalo cuma jadi tukang ojek onlen.”Ngapain kerja tapi gaji cuma buat ngganti barang-barang ilang? Tapi Nyak mah pengen anaknye semua kerja tetap,” gitu keluh si Mardani.

“Lahh … ngojek juga pan ada penghasilannye?” Emak spontan protes. Tapi semua maklum gimana kerasnye Ncing Roiyah, nyaknye Mardani. Pokoknye yang bener die doang, yang laen kaga tahu apa-apa. Kalo sampe anaknye bertindak ga sesuai pemikiran ncing Roiyah, tiap hari bakal denger sempritan. Rumahnye pan masih nempel.

Mustinye, Emak kesian ye dengar kesulitan Mardani? Tapi, pikiran Emak bercabang inget kejadian 5 taon yang lalu, giliran Ncang Pi’i yang dateng. Die mau ngawinin anak bontot yang perempuan atu-atunye. “Buat pegangan doang ini. Orkes ama tenda mah ntar dibayar pake duit kondangan. Abis hajatan gue ganti dah,” bujuk Ncang dengan tatapan seolah-olah die bilang,’masa si lo kaga kasih?’ Ncang Pi’i lantas minta tolong pinjam 1,5 juta. Sampe saat ini Emak belom pernah ngerasa terima gantinye barang sepeser acan. Mau nagih kok kaga enak ye?

Yang bikin Emak bingung, sodara-sodaranye nganggap die kayak gudang duit yang kalo perlu tinggal gesek doang: gegara die guru, ama lakinye kerja kantoran benerin komputer. Pedahal isi kartu yang digesek juga kudu dikeluarin buat bayar, bayar, bayar. Masalahnye lagi, urusan minjemnye pake azas kekeluargaan. Pas minjem melas, buat balikin inget ape kaga ya?

Anak bayinye udah mulai rewel dan ngantuk. Bininye Mardani repot nimang-nimang sambil minta tolong Mardani bikinin susu formula. Lahh kaga kerja tapi ga ngasih ASI? Batin Emak. Mereka pulang dengan membawa permintaan maap dari Emak karena kaga bisa bantu.

Bukan, bukan kaga mau bantu. Tapi mereka kan udah berani nikah, yang artinye kudu berani ngambil tanggung jawab besar. Harusnye usaha nyelesein masalah tanpa bebanin orang laen. Mungkin bisa harga sam^ung S8 ntu dicicil 2 kali pake gajinye. Kebutuhan laen, bisa ditutup dari ngojek dulu, ama turunin deh gaya hidup jangan sering-sering pulang kampung. Kalo lantas dipinjemin, Emak malah kuatir bikin mereka gampangin. Setiap kali ade masalah: ahh, ade mpok Nur ini. Kalo begini, mudah-mudahan aje yang diinget Tuhan, cuma minta tolong sama Tuhan.

Akhirnye Emak bisa bebersih ama beberes. Pas selesai sholat Isya jam sepuluh malem, Emak berdoa semoga Allah kasih jalan keluar buat Mardani. Dan doa Emak jadi tambah khusyuk pas inget die harus minta sama Allah, supaya anak-anaknye kalo udah kerja, jangaaan sampe di gudang.🌾

Kliyengan = pusing/ rasa berputar-putar

Ncang = kakak orang tuta, laki atau perempuan

Ncing = adik orang tua, laki atau perempuan
Acan = sama sekali